ވިލުންވެށި ގްރާންޓް އިވެލުއޭޝަން ކޮމިޓީގެ ފުރަތަމަ ބައްދަލުވުން ބާއްވައިފި

ވިލުންވެށި ގްރާންޓް ޕްރޮގްރާމްގެ ޕައިލެޓް ރައުންޑުގެ ދަށުން ހުށަހަޅާފައިވާ އެޕްލިކޭޝަންތައް މުރާޖައާކޮށް އެންޑޯޒްކުރުމުގެ މަސައްކަތް ފެށުމަށްޓަކައި، އެ ޕްރޮގްރާމްގެ އިވެލުއޭޝަން ކޮމިޓީގެ ފުރަތަމަ ބައްދަލުވުން މިއަދު ބާއްވައިފިއެވެ.

މި ބައްދަލުވުމުގައި ކޮމިޓީގެ މެންބަރުންނަށް ގްރާންޓް ޕްރޮގްރާމާއި، އޭގެ މަގްސަދުތަކުގެ އިތުރުން އެޕްލިކޭޝަންތައް އިވެލުއޭޓް ކުރުމުގައި މެންބަރުން އަދާކުރަންޖެހޭ ދައުރާއި މަސްއޫލިއްޔަތުތަކާ ގުޅޭގޮތުން މައުލޫމާތު އަރުވާފައިވެއެވެ. މި ކޮމިޓީން ކުރިއަށްގެންދާނީ އެސް.އެމް.އީ ޑިޖިޓަލް އިން ޝޯޓްލިސްޓްކުރާ އެޕްލިކޭޝަންތައް މުރާޖައާކޮށް، ކަނޑައެޅިފައިވާ މިންގަނޑުތަކާ އެއްގޮތަށް ޝަރުތު ހަމަވާ ފަރާތްތައް އެންޑޯޒްކުރުމުގެ މަސައްކަތެވެ.

މި ގްރާންޓަށް ކުރިމަތިލުމުގެ ފުރުސަތު ހުޅުވާލީ 1 އޯގަސްޓް 2026 ގައެވެ. މި ޕައިލެޓް ރައުންޑަށް ކަނޑައަޅާފައިވާ ލިމިޓް ކަމުގައިވާ ޝަރުތު ހަމަވާ 150 އެޕްލިކޭޝަން، ފުރުސަތު ހުޅުވާލިތާ ހަތް ދުވަސް ތެރޭގައި އެސް.އެމް.އީ ޑިޖިޓަލް އަށް ވަނީ ލިބިފައެވެ. ކުރިން ހަމަޖެހިފައި އޮތީ އޯގަސްޓް މަހުގެ ނިޔަލަށް ނުވަތަ ޝަރުތު ހަމަވާ 150 އެޕްލިކޭޝަން ހަމަވަންދެން ފުރުސަތު ހުޅުވާލާފައި ބޭއްވުމަށެވެ.

ޕައިލެޓް ރައުންޑުގެ ދަށުން ހޮވޭ 50 ފަރާތަކަށް، ކޮންމެ ފަރާތަކަށް 100,000 ރުފިޔާއާ ހަމައަށް ގްރާންޓް އެހީ ފޯރުކޮށްދިނުމަށް ވަނީ ހަމަޖެހިފައެވެ. މީގެ އިތުރުން، ހޮވޭ ޕްރޮޕޯޒަލްތައް ތަންފީޒުކުރުމަށް ބޭނުންވާ ފަންނީ އެހީތެރިކަންވެސް މި ޕްރޮގްރާމްގެ ދަށުން ފޯރުކޮށްދެވޭނެއެވެ.

މި  ގްރާންޓްގެ ދަށުން މާލީ އަދި ފަންނީ އެހީތެރިކަން ފޯރުކޮށްދިނުމަށް ކަނޑައެޅިފައިވަނީ މައިގަނޑު ތިން ދާއިރާ ނުވަތަ ތީމަކަށެވެ. އެއީ މޫސުމީ ބަދަލުތަކަށް ހޭނިފައިވާ ދަނޑުވެރިކަމާއި ކާބޯތަކެތީގެ ނިޒާމުތައް، ޑިޖިޓަލް އަދި މޫސުމީ އީޖާދުތައް، އަދި ވެލިއު-ޗެއިން ތަރައްގީކުރުމާއި، އުފެއްދުންތެރިކަން އަދި މާކެޓް އީޖާދުތަކެވެ.

މި ޕްރޮގްރާމް ހިންގުމުގެ މައިގަނޑު މަޤުޞަދަކީ އައު އީޖާދީ ޚިޔާލުތައް ތަންފީޒުކުރުމަށް ކުރިމަތިވާ މާލީ ހުރަސްތައް ނައްތާލައި، ފަރުދުންނާއި، ޖަމްޢިއްޔާ ޖަމާޢަތްތަކާއި، އީޖާދީ މަސައްކަތްކުރާ ޒުވާނުންނާއި އަންހެނުންގެ އިތުރުން، ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމެވެ.

މިއީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަމަންޓް އެންޑް އެނާރޖީ އިން ކުރިއަށްގެންދާ އެންހާންސިންގ ކްލައިމެޓް ރެޒިލިއަންސް އެންޑް ފުޑް ސެކިއުރިޓީ މަޝްރޫޢުގެ ދަށުން، އެސް.އެމް.އީ ޑިޖިޓަލް އަދި މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް ގުޅިގެން ހިންގާ ޕްރޮގްރާމެކެވެ. މިއީ ދިވެހި ސަރުކާރާއި އޭޝިއަން ޑިވެލޮޕްމަންޓް ބޭންކްގެ (އޭ.ޑީ.ބީ) މާލީ އެހީތެރިކަމާއެކު ކުރިއަށްދާ މަޝްރޫއެކެވެ.

އެންހާންސިންގ ކްލައިމެޓް ރެސިލިއަންސް އެންޑް ފުޑް ސެކިއުރިޓީ މަޝްރޫޢުގެ ލަނޑުދަނޑި ތަކުގެ ތެރޭގައި މޫސުމީ ބަދަލުތަކާ ގުޅިގެން އަންނަ ބަދަލުތަކަށް ތައްޔާރުވުމަށް މުއައްސަސާތަކާއި މުޖުތަމަޢުގެ ޤާބިލުކަން އިތުރުކުރުމާއި، ޤުދުރަތީ ވަޞީލަތްތައް ބޭނުންކޮށްގެން ފެންބޮޑުވުމާއި އުދައެރުމުން ރައްކާތެރިވުމަށް އެކަށީގެންވާ ފިޔަވަޅުތައް އެޅުމުގެ އިތުރުން ދަނޑުވެރިކަމާއި ކާބޯތަކެތީގެ ނިޒާމުތަކުގައި މޫސުމީ ބަދަލުތަކަށް އެކަށޭނަ ޓެކްނޮލޮޖީތަކާއި އާދަތައް ތަޢާރަފުކުރުން އަދި މޫސުމީ ބަދަލުތަކަށް ތައްޔާރުވުމަށް ކުރެވޭ ވިޔަފާރިތަކާއި ޚިދުމަތްތައް އިތުރުކުރުމާއި، ދަނޑުވެރިކަން ކުރިއެރުވައި ކާނާގެ ޔަޤީންކަން ކަށަވަރު ކުރުމުގެ މަސައްކަތްތައް ހިމެނެއެވެ.