"ވިލުންވެށި ސްކޫލް ގާޑަން" ޕްރޮގްރާމުގެ ފުރަތަމަ ބަގީޗާ ހިރިޔާ ސްކޫލުގައި އިފްތިތާހުކޮށްފި

ވިލުންވެށި ސްކޫލް ގާޑަން ޕްރޮގްރާމުގެ ދަށުން ގާއިމުކުރި ފުރަތަމަ ބަގީޗާ މިއަދު ހިރިޔާ ސްކޫލުގައި ރަސްމީކޮށް އިފްތިތާހުކޮށްފިއެވެ. މިއީ ރާއްޖޭގެ ދަރިވަރުންގެ މެދުގައި މޫސުމީ ބަދަލުތަކަށް ހޭނުމާއި، ދެމެހެއްޓެނިވި ދަނޑުވެރިކަމުގެ އިތުރުން ތިމާވެށީގެ ތަޢުލީމު ކުރިއެރުވުމަށް އެޅުނު މުހިންމު ފިޔަވަޅެކެވެ.

މި ޕްރޮގްރާމަކީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން ކުރިއަށްގެންދާ "އެންހާންސިންގ ކްލައިމެޓް ރެޒިލިއަންސް އެންޑް ފުޑް ސެކިއުރިޓީ" (އީ.ސީ.އާރު.އެފް.އެސް) މަޝްރޫއުގެ ދަށުން، މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއާ ގުޅިގެން ހިންގާ ހަރަކާތެކެވެ. މި ޕްރޮގްރާމް ސްކޫލްތަކުގައި ތަންފީޒުކުރަނީ މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓާ ގުޅިގެންނެވެ.

ވިލުންވެށި ސްކޫލް ގާޑަން ޕްރޮގްރާމުގެ މައިގަނޑު މަގުސަދަކީ ދަރިވަރުންނަށް ޢަމަލީ ގޮތުން ދަނޑުވެރިކަމުގެ ތަޖުރިބާ ހޯދައިދިނުމާއި އެކު ތިމާވެށި ޙިމާޔަތްކުރުމަށް ބާރުއަޅާ، މޫސުމަށް އަންނަ ބަދަލުތަކާއި ގުޅޭގޮތުން ދަރިވަރުންނަށް މަޢުލޫމާތު ފޯރުކޮށްދިނުމެވެ. އަދި ހަމައެއާއެކު، ކާނާގެ ނިއުޓްރިޝަނާއި ދުޅަހެޔޮ ކާނާގެ އިޚްތިޔާރުތަކަށް ދަރިވަރުން ހޭލުންތެރިކުރުވުމާއި، ޢަމަލީ މަސައްކަތުގެ ތެރެއިން ދިރިއުޅުމުގެ ހުނަރުތައް ތަރައްޤީކޮށް، މޫސުމީ ބަދަލުތަކަށް ހޭނިފައިވާ، ދެމެހެއްޓެނިވި ދަނޑުވެރިކަމުގެ އުކުޅުތަކަށް އަހުލުވެރިކުރުވުމެވެ.

ހިރިޔާ ސްކޫލުގެ މި ބަގީޗާއަށް "ގާޑަން އޮފް ގްރޯތް" ގެ ނަމުން ނަން ދީފައިވާއިރު، މި ބަގީޗާ ރަސްމީކޮށް އިފްތިތާޙުކޮށްދެއްވީ މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އޮނަރަބަލް ޢަލީ ޝަރީފާއި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ހާ އެކްސެލެންސީ އިޝިގާމީ ރުމީކޯއެވެ.

މި ރަސްމިއްޔާތުގައި ވަޒީރުގެ ވާހަކަފުޅުގައި، ރާއްޖޭގެ ރަށްތަކަށް އަންނަމުންދާ ތަރައްޤީއާއެކު އާބާދީ ބޮޑުވެ، އިމާރާތްތައް އުސްވަމުންދާތީ، ކާނާ އުފެއްދުމުގައި އައު އުކުޅުތަކެއް ބޭނުންކުރުމުގެ މުހިއްމުކަން ފާހަގަކުރެއްވިއެވެ. ވަޒީރު ވިދާޅުވި ގޮތުގައި، ދިރިއުޅުން އުސް އިމާރާތްތަކަށް ބަދަލުވަމުންދާއިރު، ރާއްޖޭގައި އުފައްދާ ކާނާގެ މިންވަރު އިތުރުކުރުމަށްޓަކައި "ވާޓިކަލް ފާމިންގ" ނުވަތަ އޮލަނބަށް ގަސް ހެއްދުމުގެ ނިޒާމުތައް ބޭނުންކުރުން ކޮންމެހެން ބޭނުންތެރިއެވެ

ކުރީގެ ޒަމާނުގައި ގޭގޭގެ ގޯތިތެރޭގައި މޭވާއާއި ތަރުކާރީ ހައްދައިގެން އާއިލާތަކުން ބޭނުންކުރި އާދަކާދައަށް އަލިއަޅުއްވާލައްވަމުން، އައު ޖީލުތަކުގެ ކުދިން ދަނޑުވެރިކަމަށް ޝައުޤުވެރިކުރުވުމުގެ މުހިއްމުކަން ވަޒީރު ފާހަގަކުރެއްވިއެވެ. މިގޮތުން، ސްކޫލްތަކުގައި ހަދާ ދަނޑުތަކަކީ ހަމައެކަނި ގަސް ހައްދާ ތަނެއް ނޫން ކަމަށާއި، އެއީ ދަރިވަރުންނަށް ޢަމަލީ ތަޖުރިބާ ލިބި، ދެމެހެއްޓެނިވި ދަނޑުވެރިކަމަށް ލޯބިޖެހި، ކާނާގެ ރައްކާތެރިކަމާއި ތިމާވެށި ޙިމާޔަތްކުރުމުގެ މުހިއްމުކަން ދަސްކޮށްދޭ އަގުހުރި މަރުކަޒެއްކަން ބަޔާންކުރެއްވިއެވެ

ސްކޫލް ބަގީޗާ ނުވަތަ ދަނޑަކީ ހަމައެކަނި އެންވަޔަރަންމަންޓް ކްލަބްގެ ކުދިންނަށް އަމާޒުކުރެވިފައިވާ ތަނަކަށް ނުހަދައި، ހުރިހާ ދަރިވަރުން ބައިވެރިވާ، ކިޔަވައިދިނުމުގެ ތެރޭގައި ހިމެނޭ މުހިއްމު ބަޔަކަށް ހެދުމަށް މުދައްރިސުންނަށް ވަޒީރު އިރުޝާދުދެއްވިއެވެ. މީގެ އިތުރުން، ސްކޫލުން ދަސްކުރާ ދަނޑުވެރިކަމުގެ ހުނަރުތައް ގޭގައި ބޭނުންކޮށް، ޢާއިލާތައް ހޭލުންތެރިކުރުވައި، މޫސުމީ ބަދަލުތަކަށް ހޭނިފައިވާ ދެމެހެއްޓެނިވި މުޖުތަމަޢެއް ބިނާކުރުމުގައި ދަރިވަރުންގެ ދައުރު އަދާކުރުމަށް ވަޒީރުބާރުއެޅުއްވިއެވެ

ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ހަރ އެކްސެލެންސީ އިޝިގާމީ ރުމީކޯގެ ވާހަކަފުޅުގައި، 'ވިލުންވެށި ސްކޫލް ގާރޑްން' ޕްރޮގްރާމަކީ ދިވެހިރާއްޖެއާއި ޖަޕާނާ ދެމެދު އޮންނަ ދޭދޭ ގުޅުމުގެ ތެރެއިން، މޫސުމީ ނުރައްކާތަކަށް ވިލުންތެރިކަން އިތުރުކުރުމަށާއި ކާނާގެ ޔަގީންކަން ކަށަވަރުކުރުމަށް ކުރެވޭ މަސައްކަތްތަކަށް އިތުރުވެގެންދިޔަ މުހިންމު ބޮޅެއްކަން ފާހަގަކުރެއްވިއެވެ. އަދި މިއީ މޫސުމީ ބަދަލުތަކުން އަރައިގަތުމަށާއި، ތައުލީމީ ދާއިރާ ކުރިއެރުވުމުގެ އިތުރުން، މުޖުތަމައުގެ ލާބައަށްޓަކައި ޖަޕާނު ސަރުކާރުން ފޯރުކޮށްދޭ އެހީތެރިކަމުގެ ދަށުން ކުރިއަށްގެންދެވޭ މުހިންމު މަޝްރޫއެއްކަންވެސް އެކަމަނާ ފާހަގަކުރެއްވިއެވެ.

މި ބަގީޗާ ފަރުމާކޮށްފައިވަނީ ޒަމާނީ ވަޞީލަތްތަކާއެކުގައެވެ. އޭގެ ތެރޭގައި އޮލަނބަށް ގަސްހެއްދުމަށް ބޭނުންކުރާ ސިސްޓަމްތަކާއި، ފަތްޕިލާވެލި ހެއްދުމަށް ޚާއްސަ ހައިއިޑްރޯޕޯނިކްސް ސިސްޓަމްތަކުގެ އިތުރުން މޭވާ ހައްދާނެ ޚާއްސަ ސަރަހައްދެއް ހިމެނެއެވެ. އަދި އިޤްތިޞާދީ ގޮތުން ފެން ބޭނުންކުރުމަށްޓަކައި ވާރޭފެން ރައްކާކޮށްގެން ގަސްތަކަށް ފެންދެވޭނެ ނިޒާމެއްވެސް ވަނީ ޤާއިމުކޮށްފައެވެ.

އީ.ސީ.އާރު.އެފް.އެސް މަޝްރޫއުގެ މައިގަނޑު އަމާޒަކީ ރާއްޖޭގެ ރަށްތަކަށް ކުރިމަތިވާ މޫސުމީ ނުރައްކާތަކުން ސަލާމަތްވުމަށްޓަކައި މުއައްސަސާތަކާއި ޢާންމު މުޖުތަމަޢުގެ ޤާބިލުކަން އިތުރުކުރުމެވެ. މި މަޝްރޫއުގެ ދަށުން ސްކޫލް ގާޑަން ޕްރޮގްރާމަކީ ރާއްޖޭގެ 5 ސްކޫލެއްގައި ކުރިއަށްގެންދިއުމަށް ހަމަޖެހިފައިވާ މުހިންމު ހަރަކާތެކެވެ.

މި މަޝްރޫއަށް ހަރަދުކުރަނީ އޭޝިއަން ޑިވެލޮޕްމަންޓް ބޭންކާއި، ޖަޕާން ފަންޑް ފޯ ޕްރޮސްޕަރަސް އެންޑް ރެޒިލިއަންޓް އޭޝިއާ އެންޑް ދަ ޕެސިފިކާއި، އޯޝަން ރެޒިލިއަންސް ކޯސްޓަލް އެޑަޕްޓޭޝަން ޓްރަސްޓް ފަންޑުގެ އެހީގެ އިތުރުން ދިވެހި ސަރުކާރުގެ ބަޖެޓުންނެވެ.