ވޯޓަރ ސެކްޓަރގެ ފަންނީ މުވައްޒަފުންނަށް އަމާޒުކޮށްގެން ހިންގާ "ނޭޝަނަލް ސެޓިފިކެޓް 3 އިން ޕްލަމްބިންގ" ތަމްރީނު ޕްރޮގްރާމް ފެށުމަށްޓަކައި ކިކް-އޮފް މީޓިންގއެއް ބާއްވައިފި
ވޯޓަރ ސެކްޓަރގެ ފަންނީ މުވައްޒަފުންނަށް އަމާޒުކޮށްގެން ހިންގާ "ނޭޝަނަލް ސެޓިފިކެޓް III އިން ޕްލަމްބިންގ" ތަމްރީނު ޕްރޮގްރާމް ފެށުމަށްޓަކައި، މިނިސްޓްރީން ޑޮއިޗް ފެސެލްޝާފްޓް ފުއަރ އިންޓަނޭޝަނަލް ސުސާމެންއަރބައިޓް (ޖީ.އައި.ޒެޑް) އަދި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމް.އައި.ޓީ) އާއެކު 13 ޖުލައި 2026 ގައި ކިކް-އޮފް މީޓިންގއެއް ބާއްވައިފިއެވެ.
މި ބައްދަލުވުމުގައި މިނިސްޓްރީގެ ވޯޓަރ އެންޑް ސެނިޓޭޝަން ޑިޕާޓްމަންޓުގެ އިސްވެރިންނާއި، ޖީ.އައި.ޒެޑް އަދި އެމް.އައި.ޓީގެ މަންދޫބުން ބައިވެރިވެވަޑައިގެންނެވިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ޕްރޮގްރާމް ތަންފީޒުކުރުމުގެ މަސައްކަތު ތާވަލާއި، ތަމްރީނުތައް ކުރިއަށްދާނެ ގޮތާއި، ބައިވެރިން ހޮވުމުގެ މަރުހަލާއާއި، އަދި މި ޕްރޮގްރާމް ކާމިޔާބުކަމާއެކު ކުރިއަށް ގެންދިއުމަށްޓަކައި ކުރަންޖެހޭ އެންމެހާ ކަންކަން ވިލަރެސްކުރުމާ ގުޅޭގޮތުންނެވެ.
މި ތަމްރީނަކީ ގްރީން ކްލައިމެޓް ފަންޑް (ޖީ.ސީ.އެފް) ރެޑިނަސް ޕްރޮޖެކްޓް، "ސްޓްރެންތަނިންގ ދަ ވޯޓަރ ސެކްޓަރ ފޯ އެންހާންސްޑް ޕްލޭނިންގ، ޕްރޮގްރާމިންގ އެންޑް އިމްޕްލިމެންޓޭޝަން އޮފް ކްލައިމެޓް ފައިނޭންސް އިން ދަ ރިޕަބްލިކް އޮފް މޯލްޑިވްސް" ގެ ދަށުން ހިންގޭ ހަރަކާތެކެވެ. މި މަޝްރޫޢަކީ ޖީ.ސީ.އެފްގެ މާލީ އެހީތެރިކަމާއި ޖީ.އައި.ޒެޑްގެ ފަންނީ އެހީތެރިކަމާއެކު ކުރިއަށްގެންދާ މަޝްރޫޢެކެވެ. މި މަޝްރޫޢުގެ މަޤްޞަދަކީ ފެނުގެ ދާއިރާގެ މުއައްސަސާތަކުގެ ފަންނީ ޤާބިލުކަން އިތުރުކުރުމާއި، އިސްތިރާޖީ ރޭވުންތައް ހަރުދަނާކުރުމާއި، އަދި މޫސުމީ ބަދަލުތަކަށް ކެތްތެރި ފެނާއި ނަރުދަމާގެ ނިޒާމުތައް ޤާއިމުކުރުމަށް ރާއްޖެއިން ކުރާ މަސައްކަތްތައް އިތުރަށް ހަރުދަނާކުރުމެވެ.
މި މަޝްރޫޢުގެ ދަށުން، "ނޭޝަނަލް ސެޓިފިކެޓް III އިން ޕްލަމްބިންގ" ތަމްރީނު ޕްރޮގްރާމް ހިންގުމަށް ޖީ.އައި.ޒެޑް އިން ވަނީ މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމް.އައި.ޓީ) އާ ހަވާލުކޮށްފައެވެ. ޖީ.ސީ.އެފް ރެޑިނަސް ޕްރޮޖެކްޓުން ފުރިހަމައަށް ޚަރަދުކުރާ މި ޕްރޮގްރާމްގެ ދަށުން، ވޯޓަރ އެންޑް ސެނިޓޭޝަން ޑިޕާޓްމަންޓާއި، ފެނުގެ ޚިދުމަތްދޭ ކުންފުނިތަކާއި، އަދި ކަމާގުޅޭ އެހެނިހެން މުއައްސަސާތަކުން މަދުވެގެން 40 ބައިވެރިންނަށް ޤައުމީ ފެންވަރުގައި ބަލައިގަންނަ ސަނަދެއް ހާސިލުކުރުމުގެ ފުރުސަތު ލިބިގެންދާނެއެވެ.
މި ތަމްރީނަކީ ރާއްޖޭގެ ފެނުގެ ދާއިރާގެ ފަންނީ ޤާބިލުކަން އިތުރުކުރުމަށް މި މަޝްރޫޢުން ކަނޑައަޅާފައިވާ ފުޅާ މަޤްޞަދުތަކުގެ ބައެކެވެ. ފެނުގެ ދާއިރާގައި މަސައްކަތްކުރާ މުވައްޒަފުންގެ ޕްލަމްބިންގ އަދި ފެނުގެ ނިޒާމުތައް ހިންގުމުގެ ޢިލްމާއި އަމަލީ ހުނަރު އިތުރުކުރުމުގެ ސަބަބުން، މުޅި ރާއްޖޭގައި ފޯރުކޮށްދޭ ފެނާއި ނަރުދަމާގެ ޚިދުމަތްތަކުގެ ފެންވަރު ރަނގަޅުވެ، ދެމެހެއްޓެނިވި ގޮތެއްގައި އަދި މޫސުމީ ބަދަލުތަކަށް ކެތްތެރި ނިޒާމުތަކެއްގެ ގޮތުގައި މި ޚިދުމަތްތައް ބައްޓަންކުރުމަށް މަގުފަހިވެގެންދާނެއެވެ. މީގެ އިތުރުން، މިއީ ފެނާއި ނަރުދަމާ މެނޭޖްކުރުމުގެ ދާއިރާއިން މުވައްޒަފުންގެ ފަންނީ ޤާބިލުކަން އިތުރުކުރުމަށް ޖީ.ސީ.އެފް ރެޑިނަސް ޕްރޮޖެކްޓުން ހިފާފައިވާ އަމާޒަށް ވާސިލުވުމަށް އެޅޭ މުހިންމު ފިޔަވަޅެކެވެ.
