ދިވެހިރާއްޖޭގެ ފުރަތަމަ ގްރީން ކްލައިމެޓް ފަންޑުގެ ޑައިރެކްޓް އެކްސެސް އެންޓިޓީއެއް ގޮތުގައި މޯލްޑިވްސް ފައިނޭންސް އެންޑް ލީސިންގ ކޮމްޕެނީ ފާސްކޮށްފި

މިނިސްޓްރީ އޮފް ކްލައިމެޓް ޗޭންޖް އެންވަޔަރަންމަންޓް އެންޑް އެނަރޖީ އާއި މޯލްޑިވްސް ފައިނޭންސް އެންޑް ލީސިންގ ކޮމްޕެނީ (އެމް.އެފް.އެލް.ސީ) ގުޅިގެން، މޫސުމަށް އަންނަ ބަދަލުތަކަށް ހޭނުމަށާއި، ޖައްވަށް ބޭރުވާ ވިހަ ގޭހުގެ މިންވަރު ކުޑަކުރުމަށް އެކުލަވާލާފައިވާ  ބައިނަލްއަޤްވާމީ ފަންޑުތަކަށް ރާއްޖެއިން ސީދާގޮތެއްގައި ވާސިލްވުމަށް ކުރަމުންދާ މަސައްކަތަށް މުހިއްމު ކުރިއެރުމެއް ހާސިލުކުރެވިއްޖެއެވެ. މިގޮތުން، 26 އޮކްޓޫބަރ އިން 29 އަށް ދެކުނު ކޮރެއާގެ ސޮންގްޑޯގައި ބޭއްވި ޖީ.ސީ.އެފްގެ 46 ވަނަ ބައްދަލުވުމުގައި އެމް.އެފް.އެލް.ސީގެ އެކްރެޑިޓޭޝަން ވަނީ ފާސްކޮށްފައެވެ. މިއީ ރާއްޖޭގެ މުއައްސަސާއަކަށް ޖީ.ސީ.އެފްގެ "ޑައިރެކްޓް އެކްސެސް އެންޓިޓީ"އަކަށް ވެވުނު ފުރަތަމަ ފަހަރުކަމަށްވާތީ، މިއީ ތާރީޚީ ކާމިޔާބީއެކެވެ. ޖީ.ސީ.އެފްއަކީ ތަރައްޤީވަމުން އަންނަ ޤައުމުތަކުން މޫސުމަށް އަންނަ ބަދަލުތަކަށް ހޭނުމަށާއި، ޖައްވަށް ބޭރުވާ ވިހަ ގޭހުގެ މިންވަރު ކުޑަކުރުމަށް ކުރާ މަސައްކަތްތަކަށް އެހީތެރިވުމަށް އުފައްދާފައިވާ ދުނިޔޭގެ އެންމެ ބޮޑު ފަންޑެވެ. މި އެކްރެޑިޓޭޝަންގެ ސަބަބުން ބައިނަލްއަޤްވާމީ ފަރާތްތަކަށް ބަރޯސާވާ މިންވަރު ކުޑަކޮށް ޤައުމީ އިދާރާތަކުން ސީދާ ޖީ.ސީ.އެފްއާއި ގުޅިގެން މަޝްރޫޢުތައް އެކުލަވާލައި ހިންގުމުގެ ފުރުސަތު ފަހިވެ، މިފަދަ ކަންކަމުގައި ޤައުމުގެ އިސްނެގުމާއި ބާރުވެރިކަން އިތުރުވެގެންދާނެއެވެ.

ވޭތުވެ ދިޔަ 11 މަސްދުވަހުގެ ތެރޭގައި، މިނިސްޓްރީ އޮފް ކްލައިމެޓް ޗޭންޖް އެންވަޔަރަންމަންޓް އެންޑް އެނާޖީ އާއި ޖީ.ސީ.އެފް ސެކްރެޓޭރިއެޓްގެ އެއްބާރުލުމާއި އިރުޝާދުގެ ދަށުން އެމް.އެފް.އެލް.ސީއިން ވަނީއެކްރެޑިޓޭޝަންގެ މަރުޙަލާތައް ފުރިހަމަކުރުމަށް ގިނަ ގުނަ މަސައްކަތްތަކެއް ކޮށްފައެވެ. މިގޮތުން، އެމް.އެފް.އެލް.ސީއިން ވަނީ އެ މުއައްސަސާގެ ހިންގުމާއި ފަންނީ މިންގަނޑުތައް އިތުރަށް ހަރުދަނާކޮށް، ދިމާވި ގޮންޖެހުންތަކުން އަރައިގަނެ، ޖީ.ސީ.އެފް އިން ބަލާ މިންގަނޑުތަކާއި އެއްގޮތަށް މުއައްސަސާގެ ޤާބިލުކަން އިތުރުކޮށްފައެވެ. މި ކާމިޔާބީއަކީ ބައިނަލްއަޤްވާމީ މޫސުމަށް އަންނަ ބަދަލުތަކާއި ބެހޭ ފަންޑުތަކުން ޤައުމީ މުއައްސަސާތައް މެދުވެރިކޮށް އެހީ ހޯދުމަށް ރާއްޖެއިން ކުރަމުންދާ މަސައްކަތަށް ލިބުނު ވަރަށް މުހިއްމު ކުރިއެރުމެކެވެ. 

ޖީ.ސީ.އެފް އެކްރެޑިޓޭޝަން ލިބުމާއި ގުޅިގެން އިއާދަކުރަނިވި ހަކަތައާއި، ހަކަތަ އިޤްތިޞާދުކުރުމާއި، ދެމެހެއްޓެނިވި ކަނޑުދަތުރުފަތުރާއި، ފެނުގެ ރައްކާތެރިކަމާއި ބެހޭ ދާއިރާ އަދި އެހެނިހެން ދާއިރާތަށް ހިމަނައިގެން މޫސުމަށް އަންނަ ބަދަލުތަކަށް ހޭނުމަށާއި ޖައްވަށް ބޭރުވާ ވިހަ ގޭސްތައް މަދުކުރުމަށް މާލީ އެހީތެރިކަން ފޯރުކޮށްދިނުމުގެ ފުރުސަތުތައް ހޯދައި،  މޫސުމަށް އަންނަ ބަދަލުތަކާއި ބެހޭ ޤައުމީ ޕްލޭންތަކާއި އެއްގޮތްވާގޮތަށް އެމް.އެފް.އެލް.ސީއިން މަސައްކަތް ކުރާނެއެވެ. އަދި ކުރިއަށް އޮތް ތަނުގައިވެސް، ބައިނަލްއަޤްވާމީ ފަންޑުތަކަށް ރާއްޖެއިން ސީދާގޮތެއްގައި ވާސިލްވުމަށް ކުރަމުންދާ މަސައްކަތް އިތުރަށް ފުޅާކޮށް، ރާއްޖޭގެ ވިލުންތެރިކަމާއި، ދެމެހެއްޓެނިވި ތަރައްޤީއަށް ކުރަމުންދާ މަސައްކަތް ކުރިއަށްގެންދާނެއެވެ.