މޫސުމަށް އަންނަ ބަދަލުތަކަށް ފިޔަވަޅުއެޅުމަށް ކުދި ޖަޒީރާ ގައުމުތަކަށް އެހީދޭ ނިޒާމްތައް މިހާރަށްވުރެ ހަރުދަނާކުރެވިދާނެގޮތްތަކާބެހޭގޮތުން ރާއްޖޭގެ ތަޖުރިބާ، ސުޕްރީމް އޮޑިޓް އިންސްޓިޓިއުޝަންތަކުގެ ބައްދަލުވުމުގައި މިނިސްޓަރ އަލީ ޝަރީފް ހިއްސާކުރައްވައިފި

މޫސުމަށް އަންނަ ބަދަލުތަކަށް ފިޔަވަޅު އެޅުމަށް ކުދި ޖަޒީރާ ގައުމުތަކަށް އެހީދޭ ނިޒާމްތައް މިހާރަށް ވުރެ ހަރުދަނާ ކުރެވިދާނެ ގޮތްތަކާބެހޭގޮތުން ރާއްޖޭގެ ތަޖްރިބާ  މިނިސްޓަރ އަލީ ޝަރީފް ހިއްސާކުރައްވައިފިއެވެ. މިނިސްޓަރ މިކަމާބެހޭގޮތުން ވާހަކަފުޅުދެއްކެވީ މިހާރު އ.އ. އުކުޅަހުގައި ކުރިއަށްދާ 'ސްޓްރެންތަނިންގ ދަ ކެޕޭސިޓީ އޮފް ސުޕްރީމް އޮޑިޓް އިންސްޓިޓިއުޝަންސް އިން ސްމޯލް އައިލަންޑް ޑިވެލޮޕިންގ ސްޓޭޓްސް ޓު އޮޑިޓް އިމްޕްލިމެންޓޭޝަން އޮފް ދަ އެސް. ޑީ. ޖީޒް' ބައްދަލުމުގައި ވާހަކަފުޅުއްދަކަވަމުންނެވެ.

އޮޑިޓަރ ޖެނެރަލްގެ އޮފީހާއި އ.ދ ގެ ޑިޕާޓްމަންޓް އޮފް އިކޮނޮމިކް އެންޑް ސޯޝަލް އެފެއާޒް ގުޅިގެން ބާއްވާ މި ބައްދަލުވުމުގައި، ޖަޒީރާ ގައުމުތަކަށް އެޑެޕްޓޭޝަން ފައިނޭންސް ހޯދާނެގޮތްތަކާބެހޭ ސެޝަންގެ ކީނޯޓް އެޑްރެސް ދެއްވަމުން މިނިސްޓަރ ދެއްކެވި މި ވާހަކަފުޅުގައި، މޫސުމީ ބަދަލުތަކަށް ވިލުންތެރިކަން އިތުރުކުރުމަށް ރާއްޖެއިން ކުރަމުން ގެންދާ މަސައްކަތްތަކަށް އަލިއަޅުއްވާލެއްވިއެވެ.  މިގޮތުން ބިނާވެށީގެ ވިލުންތެރިކަން އިތުރުކުރުމާއި، އިގްތިސާދު ވިލުންތެރިކުރުމާއި، ކާބޯތަކެއްޗާއި ފެން ލިބުމުގެ ޔަގީންކަން ކަށަވަރުކުރުމާއި އަދި ބަޔޯޑައިވަރސިޓީ އާއި ފަރުތައް ޙިމާޔަތްކުރުމަށް ކުރަމުންގެންދާ މަސައްކަތައް ހިއްސާކުރެއްވިއެވެ.

މިނިސްޓަރ ގެ ވާހަކަފުޅުގައި، އެހީދޭ ޖަމާއަތްތަކުން މިފަދަ އެހީދިނުމަށް އިސްކަންދޭން ގެންގުޅޭ މިންގަޑުގެ ގޮތުގައި ޖީ.ޑީ.ޕީ. އިން ބޮލަކަށްޖެހޭ އާމްދާނީ ގުނުން މިއީ މީސްމަދު ޖަޒީރާގައުމުތަކަށް ގެއްލުންހުރި މިންގަނޑެއްކަން ފާހަގަކުރެއްވިއެވެ. އަދި މީގެ ސަބަބުން މޫސުމީ ބަދަލުތަކުން ރައްކާތެރިކަން ހޯދަން ކޮންމެހެން ހިންގަންޖެހޭ މަޝްރޫޢުތަކަށް ފަންޑުކުރުމަށް ކޮމާޝަލް ރޭޓްގައި ދަރަނި ނަގަންޖެހި، ގައުމުގެ ދަރަނި އިތުރުވަމުންދާކަމަށް ވެސް ފާހަގަކުރެއްވިއެވެ. އެހެންކަމުން މިފަދަ އެހީދޭ ނިޒާމްތައް އަވަސްގޮތަކަށް އިސްލާހުކުރުމަށް އެމަނިކުފާނު ގޮވާލެއްވިއެވެ. މީގެ އިތުރުން ފަންޑުހޯދުމަށް މިފަދަ އިދާރާތަކުން އާންމުކޮށް ލާޒިމްކުރާ ޝަރުތުތަކަކީ ކުދި ގައުމުތަކާ ނުބައްދަލު، ތަކްލީފްބޮޑެތި ޝަރުތުތަކެއް ކަމަށްވާތީ، އެހީލިބޭ ދުވެލި ލަސްވާކަން ފާހަގަކުރެއްވިއެވެ. މީގެ އިތުރުން، ޔޫ.އެން.އެފް.ސީ.ސީ.ސީ އާއި ޕެރިސްގެ އެގްރިމެންޓްގެ ދަށުން ތަރައްގީވެފައިވާ ގައުމުތަކުން ތަރައްގީވަމުން އަންނަ ގައުމުތަކަށްދޭ ކްލައިމެޓް ފައިނޭންސް ދިނުމަށް ކަނޑައަޅާފައިވާ ލަނޑުދަނޑިތައް ހާސިލްވަމުންދާ މިންވަރު ކަށަވަރުކުރުމުގައި ސްޕްރީމް އޮޑިޓް އިންސްޓިޓިއުޝަން (އެސް. އޭ. އައި.) ތަކުން  މުހިއްމު ދައުރެއް އަދާކުރެވިދާނެކަމަށް އެމަނިކުފާނު ފާހަގަކުރެއްވިއެވެ.

މި ސެޝަންގެ ޕެނަލް މަޝްވަރާގައި މިނިސްޓްރީގެ ޑިރެކްޓަރ ޢާއިޝަތު އައިލީން ނިޔާޒް ބައިވެރިވެވަޑައިގެން، ކްލައިމެޓް ފައިނޭންސް ބޭނުންކުރުން ހަރުދަނާކުރުމަށް ޖަޒީރާ ގައުމުތައް ގުޅިގެން ކުރެވިދާނެކަންކަމާބެހޭގޮތުންނާއި، އެސް. އޭ. އައި. ތަކުގެ ދައުރަށް އަލިއަޅުއްވާލެއްވިއެވެ.