މުޙްއިއްދީން ސްކޫލުގެ ވިލުންވެށި ބަގީޗާ އިފްތިތާޙުކުރުން

"ވިލުންވެށި" ސްކޫލް ބަގީޗާ ދެމެހެއްޓެނިވި ގޮތެއްގައި ކުރިއަށްގެންދިއުމުގެ ޕްލޭން މުރާޖަޢާކޮށް އިތުރަށް ފުރިހަމަކުރުމަށްޓަކައި މުޙްއިއްދީން ސްކޫލުގައި މަސައްކަތު ބައްދަލުވުމެއް ބާއްވައިފިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ބަގީޗާ މެދުކެނޑުމެއްނެތި ބަލަހައްޓައި ބޭނުންކުރެވޭނެ އިންތިޒާމުތައް ކަށަވަރުކުރުމަށާއި، ބަގީޗާގައި ހިންގޭ ތަފާތު ހަރަކާތްތައް ކްލާސްރޫމްތަކުގެ ފިލާވަޅުތަކާ ގުޅުވައިލެވޭނެ ގޮތްތަކާ ބެހޭގޮތުންނެވެ.

މި ބައްދަލުވުން ފެށުމުގެ ރަސްމިއްޔާތު ޝަރަފުވެރިކޮށްދެއްވާ މުޙްއިއްދީން ސްކޫލުގެ ބަގީޗާ "ނިރު" ރަސްމީކޮށް އިފްތިތާޙުކޮށްދެއްވީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ ޑެޕިއުޓީ މިނިސްޓަރ އަލްފާޟިލް މުޙައްމަދު މޫސާއެވެ. ޑެޕިއުޓީ މިނިސްޓަރގެ ވާހަކަފުޅުގައި މިފަދަ އަގުހުރި ޕްރޮގުރާމެއް ސްކޫލުތަކުގައި ހިންގުމުގެ އެންމެ ބޮޑު އެއް ބޭނުމަކީ، މީހުން ގިނަވެ ތޮއްޖެހިފައިވާ އާބާދީތަކުގައްޔާއި ބިން ދަތި ސަރަޙައްދުތަކުގައި، ޒަމާނީ އުކުޅުތައް ބޭނުންކޮށްގެން ދަނޑުވެރިކަން ކުރެވިދާނެ ތަފާތު ގޮތްތައް އަމަލީ ގޮތުން ދަސްކޮށްދިނުން. ހަމައެއާއެކު، ސްކޫލުގެ ތަޢުލީމީ މާހައުލުގައި މިފަދަ ބިނާކުރަނިވި ކަންކަމަށް ދަރިވަރުންނާއި މުދައްރިސުންގެ ޝައުޤުވެރިކަން އިތުރުކޮށް، ދަނޑުވެރިކަމުގެ ހުނަރުތައް ދަސްކޮށްދިނުން. އަދި އަމިއްލަ އަތުން ގަސްއިންދައިގެން ހައްދާ، އެއްވެސް ކެމިކަލެއް ނެތް ތާޒާ، ޞިއްޙަތަށް ފައިދާހުރި ކާނާ، ކެއުމުގައި ބޭނުންކުރުމުގެ ރަނގަޅު އާދަ އަޅުގަނޑުމެންގެ ދިރިއުޅުމުގެ ބައެއްގެ ގޮތުގައި އަށަގެންނެވުމަށްޓަކައި އަޅަންޖެހޭ މުހިންމު ފިޔަވަޅުތައް އެޅުން ކަމުގައެވެ.

މި މަސައްކަތު ބައްދަލުވުމުގައި މިސްކޫލުން ޖުމްލަ 19 ދަރިވަރުންނާއި މުދައްރިސުންނާއި މުވައްޒަފުން ބައިވެރިވިއެވެ. މިމަސައްކަތު ބައްދަލުވުމުގެ ނަތީޖާއެއްގެ ގޮތުން މުޙްއިއްދީންގެ ބަގީޗާއަށް ތައްޔާރުކުރެވިފައިވާ ދުރު ރާސްތާ ޕްލޭނެއް އިތުރަށް ފުރިހަމަވެގެންދާނެއެވެ. މި ޕްލޭންގެ މަޤްޞަދަކީ ދަރިވަރުންނާއި މުދައްރިސުންގެ ބައިވެރިވުން އިތުރުކުރުމާއި، ބަގީޗާގެ ހަރަކާތްތައް ތަފާތު އެކި މާއްދާތަކުގެ ތެރޭގައި ހިމެނުމެވެ. އަދި ދަނޑުވެރިކަމުގެ އުކުޅުތަކާއި، އަމިއްލައަށް ހައްދާ ތަކެތީގެ ފައިދާހުރި މިންވަރާ ބެހޭގޮތުން މަޢުލޫމާތު އުނގެނުމުގެ ފުރުޞަތުތައް ފަހިކޮށްދިނުމެވެ.

ވިލުންވެށި ސްކޫލް ގާޑަން ޕްރޮގްރާމުގެ މައިގަނޑު މަގުސަދަކީ ދަރިވަރުންނަށް ޢަމަލީ ގޮތުން ދަނޑުވެރިކަމުގެ ތަޖުރިބާ ހޯދައިދިނުމާއި އެކު ތިމާވެށި ޙިމާޔަތްކުރުމަށް ބާރުއަޅާ، މޫސުމަށް އަންނަ ބަދަލުތަކާއި ގުޅޭގޮތުން ދަރިވަރުންނަށް މަޢުލޫމާތު ފޯރުކޮށްދިނުމެވެ. އަދި ހަމައެއާއެކު، ކާނާގެ ނިއުޓްރިޝަނާއި ދުޅަހެޔޮ ކާނާގެ އިޚްތިޔާރުތަކަށް ދަރިވަރުން ހޭލުންތެރިކުރުވުމާއި، ޢަމަލީ މަސައްކަތުގެ ތެރެއިން ދިރިއުޅުމުގެ ހުނަރުތައް ތަރައްޤީކޮށް، މޫސުމީ ބަދަލުތަކަށް ހޭނިފައިވާ، ދެމެހެއްޓެނިވި ދަނޑުވެރިކަމުގެ އުކުޅުތަކަށް އަހުލުވެރިކުރުވުމެވެ. 

މި ޕްރޮގްރާމްގެ ދަށުން ގްރޭޓަރ މާލެ ސަރަޙައްދުގެ ތިން ސްކޫލު ކަމުގައިވާ ޣާޒީ ސްކޫލް، ހިރިޔާ ސްކޫލް އަދި މުޙްޔިއްދީން ސްކޫލުގައި މިހާރުވަނީ ބަގީޗާ ތަރައްގީކުރެވިފައެވެ. މީގެ އިތުރުން އައްޑޫ އަތޮޅު މަދަރުސާ، ހިތަދޫ ސްކޫލް އަދި ކުޅުދުއްފުށި ސިޓީގެ އަފީފުއްދީން ސްކޫލްގައި ބަގީޗާ ތަރައްގީ ކުރުމުގެ މަސައްކަތް އަންނަނީ ކުރެވެމުންނެވެ.                   

މިޕްރޮގްރާމަކީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން ކުރިއަށްގެންދާ "އެންހާންސިންގ ކްލައިމެޓް ރެޒިލިއަންސް އެންޑް ފުޑް ސެކިއުރިޓީ" (އީ.ސީ.އާރު.އެފް.އެސް) މަޝްރޫއުގެ ދަށުން، މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއާ ގުޅިގެން ހިންގާ ހަރަކާތެކެވެ. މި ޕްރޮގްރާމް ސްކޫލްތަކުގައި ތަންފީޒުކުރަނީ މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓާ ގުޅިގެންނެވެ. އައްޑޫ އަތޮޅުގައި މިޕްރޮގުރާމު ކުރިއަށްގެންދެވެނީ އައްޑު އަތޮޅު މަދަރުސާގަޔާއި ހިތަދޫ ސްކޫލްގައެވެ.

އީ.ސީ.އާރު.އެފް.އެސް މަޝްރޫއުގެ މައިގަނޑު އަމާޒަކީ ރާއްޖޭގެ ރަށްތަކަށް ކުރިމަތިވާ މޫސުމީ ނުރައްކާތަކުން ސަލާމަތްވުމަށްޓަކައި މުއައްސަސާތަކާއި ޢާންމު މުޖުތަމަޢުގެ ޤާބިލުކަން އިތުރުކުރުމެވެ. މި މަޝްރޫއުގެ ދަށުން ސްކޫލް ގާޑަން ޕްރޮގްރާމަކީ ރާއްޖޭގެ 5 ސްކޫލެއްގައި ކުރިއަށްގެންދިއުމަށް ހަމަޖެހިފައިވާ މުހިންމު ހަރަކާތެކެވެ.  

މި މަޝްރޫއަށް ހަރަދުކުރަނީ އޭޝިއަން ޑިވެލޮޕްމަންޓް ބޭންކާއި، ޖަޕާން ފަންޑް ފޯ ޕްރޮސްޕަރަސް އެންޑް ރެޒިލިއަންޓް އޭޝިއާ އެންޑް ދަ ޕެސިފިކާއި، އޯޝަން ރެޒިލިއަންސް ކޯސްޓަލް އެޑަޕްޓޭޝަން ޓްރަސްޓް ފަންޑުގެ އެހީގެ އިތުރުން ދިވެހި ސަރުކާރުގެ ބަޖެޓުންނެވެ.