ރާއްޖޭގެ ގޭބިސީތަކުގައި ކަރަންޓު ބޭނުންކުރާގޮތް ދެނެގަތުމަށް ހެދި ދިރާސާގެ ހޯދުންތަކާއި ބެހޭގޮތުން މަޝްވަރާކުރުމަށް ބޭއްވި މަސައްކަތު ބައްދަލުވުން

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން، ކްލައިމެޓް އެންޑް ކްލީން އެއާ ކޯލިޝަން (CCAC) އާއި ނެކްސިއާ މޯލްޑިވްސް އާއި ގުޅިގެން، ރާއްޖޭގެ ގޭބިސީތަކުގައި ކަރަންޓު ބޭނުންކުރާގޮތް ދެނެގަތުމަށް ހެދި ދިރާސާގެ ހޯދުންތަކާއި ބެހޭގޮތުން މަޝްވަރާކުރުމަށް މަސައްކަތު ބައްދަލުވުމެއް 27 އޮކްޓޫބަރު 2026 ގައި ބާއްވާފިއެވެ.

މި ބަދަލުވުމުގައި، މި ދިރާސާއިން ހޯދިފައިވާ ކަންކަމާގުޅޭގޮތުން، ބައްދަލުވުމުގައި ބައިވެރިވި ފަރާތްތަކުން ވަނީ ޚިޔާލުފާލުކޮށް ފުޅާދާއިރާއެއްގައި މަޝްވަރާކޮށްފައެވެ.

މި ދިރާސާގައި ބަލާފައިވަނީ ހަކަތަ އިޤްތިޞާދުކުރުމުގެ ހޭލުންތެރިކަމާއި ކަރަންޓު ބޭނުންކުރާ ތަކެތި ގަންނައިރު ސަމާލުކަންދޭ ކަންކަމާއި މުދާ ގަތުމުގައި ކޮންޒިއުމަރުންނަށް ނުފޫޒު ފޯރުވާ ކަންކަމާއި ހަކަތަ ސަމަކާރަ ތަކެތި ގަތުމަށް ލިބެންހުރި މާލީ އެހީތެރިކަމުގެ ފުރުޞަތުތައް އެނގޭ މިންވަރާއި "ހަކަތަރި" ލޭބަލާ މެދު ރައްޔިތުންގެ ހޭލުންތެރިކަން ހުރި މިންވަރު ވަޒަންކުރުމަށެވެ.

2017 ވަނަ އަހަރު މިކަމާގުޅިގެން ހަދާފައިވާ ބޭސްލައިން ދިރާސާއާއި މި އަހަރު ކުރެވުނު ދިރާސާގެ ހޯދުންތަކާ ހުރި ފަރަގުތަކާ ގުޅޭގޮތުން ވަނީ ބައްދަލުވުމުގެ ބައިވެރިންގެ މެދުގައި މަޝްވަރާކޮށް ޚިޔާލު ހޯދާފައެވެ.

މި ދިރާސާގެ ހޯދުންތަކާއި ގުޅޭގޮތުން މަޝްވަރާކުރުމަށް ބޭއްވުނުގެ މި މަސައްކަތު ބައްދަލުވުމުގެ ސަބަބުން ހަކަތަރި ލޭބަލް ޕްރޮގްރާމާއި ހަކަތައިގެ ދާއިރާގެ ސިޔާސަތުތައް ކަނޑައެޅުމުށާއި ހޭލުންތެރިކަމުގެ ޕްރޮގްރާމްތައް އެކުލަވައިލާ ހިންގުމުގައި ވަރަށް ބޮޑު އެހީތެރިކަމެއް ލިބިގެންދާނެއެވެ.