ސްކައުޓުންނާ ގުޅިގެން 5 މިލިއަން "ޓްރީ ގާޑިއަން ބެޖް" ތަޢާރަފުކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 5 މިލިއަން ގަސް އިންދުމުގެ ޕްރޮގްރާމް އިތުރަށް ފުޅާކުރުމުގެ ގޮތުން، މިނިސްޓްރީ އޮފް ކުލައިމެޓްޗޭންޖް އެންވަޔަރަމަންޓް އެންޑް އެނާރޖީ އާއި ސްކައުޓް އެސޯސިއޭޝަނާ ގުޅިގެން ޚާއްޞަ "ޓްރީ ގާޑިއަން ބެޖް" މިއަދު ރަސްމީކޮށް ލޯންޗުކޮށްފިއެވެ. މި ބެޖް ލޯންޗުކޮށްދެއްވީ މިނިސްޓަރ އޮފް ކުލައިމެޓް ޗޭންޖް އެންވަޔަރަމަންޓް އެންޑް އެނާރޖީ އޮނަރަބަލް ޢަލީ ޝަރީފުއެވެ.

އަދި މިކަމަށް ހާއްސަކޮށް މިއަދު މިނިސްޓްރީގައި ބޭއްވި ރަސްމިއަޔާތުގައި އެމްއޯޔޫގައި މިނިސްޓްރީގެ ފަރާތުން ސޮއި ކުރެއްވީ ފަސް މިލިއަން ގަސް އިންދުމުގެ ޕްރޮގްރާމު ހިންގުމާއި ހަވާލުވެ ހުންނެވި، ޑެޕިއުޓީ މިނިސްޓަރ އަހްމަދު އަތީފް އަދި ސްކައުޓް އެސޯސިއޭޝަންގެ ފަރާތުން ސޮއި ކުރެއްވީ އެ އެސޯސިއޭޝަންގެ ނައިބު ރައީސް އަހުމަދު ހަނީފެވެ.

މި ބެޖަކީ ރާއްޖޭގައި ފުޅާ ދާއިރާއެއްގައި ގަސް އިންދުމުގެ ބޮޑެތި ޙަރަކާތްތައް ހިންގުމަށާއި، މި ޤައުމީ މަޝްރޫޢަށް ޒުވާނުންނާއި ކުޑަކުދިން އަހުލުވެރިކުރުމުގެ މުހިންމު މަޤްޞަދުގައި ތަޢާރަފުކުރެވުނު ބެޖެކެވެ. މި ބެޖު ހާސިލުކުރެވޭނެ އުޞޫލުތައް ބަޔާންކުރާ ގައިޑްލައިނެއް މިހާރު އެކުލަވާލާފައިވާއިރު، މި ޙަރަކާތުގެ ދަށުން އިންދުމަށް ބޭނުންވާ ގަސްތައް ސްކައުޓުންނަށް ފޯރުކޮށްދޭނީ މިނިސްޓްރީންނެވެ. އަދި ސްކައުޓުން އިންދާ ގަސްތައް ރަނގަޅަށް ހެދެންދެން އެ ތަކެތި ބަލަހައްޓައި މޮނިޓަރ ކުރަންޖެހޭނެއެވެ.

މިނިސްޓަރ އަލީ ޝަރީފް ވިދާޅުވިގޮތުގައި ފަސް މިލިއަން ގަސްއިންދުމުގެ ވައުދަކީ، ބިން ހިއްކުމާއި، ތަންތަން ޒީނައިތެރި ކުރުމުގެ ކަންކަން ހިނގާއިރު، އެތަންތަން ފެހިކުރަން ވެސް ވަރަށް ބޮޑަށް ފޯކަސްކޮށްގެން ކުރިއަށް ދާނެ ޕްރޮގުރާމެއްކަމަށެވެ. އަދި ސްކައުންޓުން މި ޕްރޮގުރާމަށް ވަނުމަކީ މި ޕްރޮގުރާމަށް ލިބުނު އިތުރު ފުޅަކުރުމަށް އަދި އިތުރު ކުރިއެރުމެކެވެ. އަދި މި އިތުރުވާ ބެޖަކީ ސްކައުޓުންނަށް ބޭނުންތެރި އެހާމެ މުހިންމު ބެޖަކަށް ވެގެން ދާނެއެވެ.

މިނިސްޓްރީ އޮފް ކުލައިމެޓްޗޭންޖް އެންވަޔަރަމަންޓް އެންޑް އެނާރޖީ އިން މަޢުލޫމާތު ދެއްވާ ގޮތުގައި، ސްކައުޓް އެސޯސިއޭޝަނާ ގުޅިގެން ގިނަ ޙަރަކާތްތަކެއް ކުރިއަށް ގެންދިއުމަށް ވަނީ ރޭވިފައެވެ. އަދި މި ބެޖާއެކު އެކިއެކި އިވެންޓްތައް ރޭވުމުގެ މަސައްކަތް މިހާރުވެސް ދަނީ ކުރެވެމުންނެވެ.

ރާއްޖެ ފެހިކުރުމަށް ސަރުކާރުން ފަށާފައިވާ މި ބޮޑު މަޝްރޫޢުގެ ދަށުން، މި އަހަރުގެ މިހާތަނަށް ވަނީ 2.3 މިލިއަން ގަސް އިންދާފައެވެ. މީގެއިތުރުން، މި ޕްރޮގްރާމް ދެމެހެއްޓެނިވި ގޮތެއްގައި ކުރިއަށް ގެންދިއުމަށްޓަކައި ރާއްޖޭގެ 20 ރަށެއްގައި ގަސް ހައްދާ ނާސަރީތައް ޤާއިމުކުރުމުގެ މަސައްކަތްވެސް މިހާރު ބާރަށް ކުރިއަށް އެބަދެއެވެ.