ތައިލެންޑުގައި ކުރިއަށްދާ އޭޝިއާގެ ކްލައިމެޓް ޓެކްނޮލޮޖީ އަދި އެނަރޖީ ޓްރާންސިޝަން ޕްރޮގްރާމްގައި ދިވެހިރާއްޖެއިން ބައިވެރިވެއްޖެ
މޫސުމީ ބަދަލުތަކާ ބެހޭ ޓެކްނޮލޮޖީތައް ރޭވުމުގެ މަރުހަލާއިން އަމަލީ ގޮތުން ތަންފީޒުކުރުމުގެ މަރުހަލާއަށް ގެންދިއުމަށް ގައުމުތަކަށް އެހީތެރިވުމުގެ މަގުސަދުގައި ތައިލެންޑުގައި ކުރިއަށްދާ މި ޕްރޮގްރާމުގައި ރާއްޖޭގެ ފަރާތުން ބައިވެރިވެވަޑައިގަންނަވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީގެ ޑިރެކްޓަރ ޖެނެރަލް އަމްޖަދު އަބްދުﷲ އާއި ޑިރެކްޓަރ ޖެނެރަލް އަހުމަދު އަލީއެވެ.
" 2026 ޖޮއިންޓް ޕްރޮގްރާމް: އެން.ޑީ.އީ ފޯރަމް އެންޑް އެން.ޑީ.އީ-އެން.ޑީ.އޭ ކޯޑިނޭޝަން އިން އޭޝިއާ" ގެ ނަމުގައި ކުރިއަށްދާ މި ހަރަކާތަކީ ޔުނައިޓެޑް ނޭޝަންސް ކްލައިމެޓް ޓެކްނޮލޮޖީ ސެންޓަރ އަދި ނެޓްވޯކް (ސީ.ޓީ.ސީ.އެން) އާއި ގްރީން ކްލައިމެޓް ފަންޑް (ޖީ.ސީ.އެފް) އަދި ތައިލެންޑުގެ އޮފީސް އޮފް ނޭޝަނަލް ހަޔަރ އެޑިޔުކޭޝަން ސައިންސް ރިސާޗް އެންޑް އިނޮވޭޝަން ޕޮލިސީ ކައުންސިލް ގުޅިގެން ބާއްވާ ޕްރޮގްރާމެކެވެ. މި ބައްދަލުވުންތައް ޖުލައި 7 އިން 10 އަށް ކުރިއަށްދާނީ ތައިލެންޑުގެ ޕުލްމަން ޕަޓާޔާގައެވެ.
ހަތަރު ދުވަހުގެ މުއްދަތަށް ކުރިއަށްދާ މި ޕްރޮގްރާމުގައި އޭޝިއާ ސަރަހައްދުގެ ގައުމުތަކުގެ ކަމާބެހޭ އިދާރާތަކުގެ އިސްވެރިން ބައިވެރިވެ، މޫސުމީ ޓެކްނޮލޮޖީއާއި، ސާފު ހަކަތަ، އަދި މޫސުމީ ކަންކަމަށް ފައިސާ ހޯދުމުގެ ދާއިރާއިން ސަރަހައްދީ އެއްބާރުލުން އިތުރުކުރުމާ ގުޅޭގޮތުން މަޝްވަރާކުރާނެއެވެ.
މި ޕްރޮގްރާމުގެ ސެޝަންތަކުގައި އޭޝިއާގެ ހަކަތައިގެ ދާއިރާއަށް އަންނަ ބަދަލުތަކާއި، އަލަށް ތައާރަފުވަމުންދާ ހަކަތައިގެ ޓެކްނޮލޮޖީތަކާއި، އާޓިފިޝަލް އިންޓެލިޖެންސް ބޭނުންކޮށްގެން މޫސުމީ މައްސަލަތަކަށް ހޯދޭނެ ހައްލުތަކުގެ އިތުރުން، މޫސުމީ ޓެކްނޮލޮޖީއާއި ފައިނޭންސް ދާއިރާގެ މުއައްސަސާތަކުގެ މެދުގައި އޮންނަ ގުޅުން ހަރުދަނާކުރުމާ ގުޅޭގޮތުން މައުލޫމާތު ބަދަލުކުރެވޭނެއެވެ.
މީގެއިތުރުން، މި ޕްރޮގްރާމުގެ ތެރެއިން ސާފު ހަކަތަ އާއި މޫސުމީ ބަދަލުތަކުގެ ދާއިރާގައި މަސައްކަތްކުރާ ތަޖުރިބާކާރުންނާ ބައްދަލުކޮށް، ޓެކްނޮލޮޖީގެ ދާއިރާގައި މަސައްކަތްކުރާ ފަރާތްތަކާ ގުޅުން ބަދަހިކުރުމުގެ އިތުރުން މިދާއިރާތަކުން ދިވެހިރާއްޖެ އަށް އައު އީޖާދީ ގޮތްތައް ތައާރަފުކުރުމަށް ފުރުސަތު ލިބޭނެއެވެ. މިއީ ރާއްޖޭގެ ތިމާވެށީގެ ރައްކާތެރިކަމާއި ހަކަތައިގެ އަމާޒުތަކަށް ވާސިލުވުމަށް ބޭނުންވާ މަޝްރޫއުތައް ފަރުމާކުރުމަށް ލިބޭނެ މުހިންމު އެހީތެރިކަމެކެވެ.