ރިޔާޟުގައި ބޭއްވި އައި.އީ.އެފް މިނިސްޓީރިއަލް ބައްދަލުވުމާއި ޑަބްލިޔު.ޕީ.ސީ އެނަރޖީ ކޮންގްރެސްގައި ދިވެހިރާއްޖެ ބައިވެރިވެއްޖެ

11 އޮކްޓޫބަރު 2026 ގައި ބޭއްވުނު 17 ވަނަ އިންޓަރނޭޝަނަލް އެނަރޖީ ފޯރަމް (އައި.އީ.އެފް) މިނިސްޓީރިއަލް ބައްދަލުވުމާއި، 12 އިން 14 އޮކްޓޫބަރަށް ސަޢޫދީ ޢަރަބިއްޔާގެ ރިޔާޟުގައި ކުރިއަށްދިޔަ 25 ވަނަ ޑަބްލިޔު.ޕީ.ސީ އެނަރޖީ ކޮންގްރެސްގައި ރާއްޖޭގެ ފަރާތުން މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާގެ ސްޓޭޓް މިނިސްޓަރ ޑރ. މުއާވިޔަތު މުޙައްމަދު ބައިވެރިވެ ވަޑައިގެންފިއެވެ.

25 ވަނަ ޑަބްލިޔު.ޕީ.ސީ އެނަރޖީ ކޮންގްރެސްއަކީ ސިޔާސަތު ކަނޑައަޅާ ފަރާތްތަކާއި، ހަކަތައާ ބެހޭ ވަޒީރުންނާއި، ސިނާޢީ ދާއިރާގެ މަންދޫބުންނާއި އަދި ފަންނީ މާހިރުންނަށް ހަކަތައިގެ މުސްތަޤުބަލު ބައްޓަންކުރުމުގައި ދިމާވާ އާ ކަންކަމާއި ޓްރެންޑްތަކާ ގުޅޭގޮތުން މަޢުލޫމާތު ޙިއްޞާކުރުމަށް ބާއްވާ ބައިނަލްއަޤްވާމީ ކޮންގްރެސްއެކެވެ.

މި އަހަރުގެ ކޮންގްރެސް ޚާއްޞަކޮށްފައިވަނީ ހަކަތައިގެ ސަލާމަތާއި ރައްކާތެރިކަމާއި ޓެކްނޮލޮޖީގެ އައު އީޖާދުތަކާއި އިންވެސްޓްމަންޓާއި ހަކަތައިގެ ޤާބިލުކަން އިތުރުކުރުމާއި އަދި ދެމެހެއްޓެނިވި ހަކަތައިގެ ނިޒާމުތައް ތަރައްޤީ ކުރުމުގެ މައްޗަށެވެ. އަދި ދެމެހެއްޓެނިވި ތަރައްޤީއަށްޓަކައި، ސާފު ހަކަތައިގެ ޓެކްނޮލޮޖީގެ ދައުރާއި، އިއާދަކުރަނިވި ހަކަތަ ކުރިއެރުވުމާއި، އަދި އިތުރުވަމުންދާ ހަކަތައިގެ ބޭނުންތައް ފުއްދުމަށް ބޭނުންވާނެ އުޞޫލުތަކާ ބެހޭގޮތުން މި ކޮންގްރެސްގައި ވަނީ މަޝްވަރާކޮށްފައެވެ.

މީގެއިތުރުން، ހަކަތައިގެ ސަލާމަތާއި ރައްކާތެރިކަމާއި، ބާޒާރުގެ ހަމަޖެހުމާއި، ހާމަކަން ބޮޑުގޮތެއްގައި ކަންކަން ކުރުމާއި ގުޅުން ބަދަހިކުރުމާއި، އިންވެސްޓްމަންޓްތަކާއި، ބައިނަލްއަޤްވާމީ އެއްބާރުލުމާއި، އަދި އިތުބާރާއިއެކު އަގުހެޔޮކޮށް ހަކަތަ ލިބޭނެ މަގު ފަހިކޮށްދިނުމުގެ މުހިންމުކަމާމެދު މި ބައްދަލުވުމުގައި ވަނީ މަޝްވަރާކޮށްފައެވެ.