އެޗްއެފްސީ ކޯޓާ އަދި ލައިސަންސިންގ ނިޒާމާ ބެހޭގޮތުން ބޫޓާންގައި ބާއްވާ ބައްދަލުވުމުގައި ދިވެހިރާއްޖޭން ބައިވެރިވެއްޖެ
ތިމްޕޫ، ބޫޓާން – ޔުނެޕް އޯޒޯން އެކްޝަންގެ ކޮމްޕްލަޔަންސް އެސިސްޓެންސް ޕްރޮގްރާމުން އިންތިޒާމުކޮށްގެން އޯގަސްޓް 4 އިން 6 އަށް ބޫޓާންގެ ތިމްޕޫގައި ބާއްވާ، ދެކުނު އޭޝިއާގެ ނޭޝަނަލް އޯޒޯން އޮފިސަރުންގެ ތެމެޓިކް ބައްދަލުވުމުގައި ދިވެހިރާއްޖޭން ބައިވެރިވެއްޖެއެވެ.
މޯންޓްރިއާލް ޕްރޮޓޮކޯލްގެ ކިގާލީ އެމެންޑްމަންޓަށް ތާއީދުކުރުމުގެ ގޮތުން ބާއްވާ މި ބައްދަލުވުމުގައި، ރާއްޖޭގެ ފަރާތުން ވަނީ އެޗްއެފްސީ (HFC) ލައިސަންސިންގ އަދި ކޯޓާ ނިޒާމާ ބެހޭގޮތުން ޚާއްޞަ ޕްރެޒެންޓޭޝަނެއް ހުށަހަޅާފައެވެ. މި ޕްރެޒެންޓޭޝަންގައި ރާއްޖެއިން ހޯދާފައިވާ ކުރިއެރުންތަކާއި، ތަޖުރިބާތައް އަދި ކުރިމަތިވާ ގޮންޖެހުންތަކުގެ މަޢުލޫމާތު ހިއްސާކޮށްފައިވެއެވެ. މީގެ އިތުރުން، ދެކުނު އޭޝިއާ ސަރަޙައްދުގައި އެޗްއެފްސީ ބޭނުންކުރާ މިންވަރު މަދުކުރުމަށްޓަކައި ލައިސަންސް ދިނުމުގެ ނިޒާމު ހަރުދަނާކުރުމާއި، ކަސްޓަމްސް އެއްބާރުލުން އިތުރުކުރުމާއި، އަދި ސިޔާސަތުތައް އެކުލަވާލުމާ ބެހޭގޮތުން ކުރިއަށްދާ މަޝްވަރާތަކުގައި ރާއްޖޭން ދަނީ އަމަލީ ގޮތުން ބައިވެރިވަމުންނެވެ.
