ފަންޑް ފޯ ރެސްޕޮންޑިންގ ޓު ލޮސް އެންޑް ޑެމޭޖް ގެ 9 ވަނަ ބޯޑު ބައްދަލުވުމުގައި ރާއްޖެއިން ބައިވެރިވެއްޖެ

މި މަހުގެ 8 އިން 10 އަށް ފިލިޕީންސްގެ ވެރިރަށް މަނީލާގައި ބޭއްވުމަށް ހަމަޖެހިފައިވާ ފަންޑް ފޯ ރެސްޕޮންޑިންގ ޓު ލޮސް އެންޑް ޑެމެޖް (އެފް.އާރު.އެލް.ޑީ.) ބޯޑުގެ 9 ވަނަ ބައްދަލުވުމުގައި ދިވެހިރާއްޖެއިން ވަނީ ބައިވެރިވެފައިއެވެ. މި ބައްދަލުވުމުގައި ރާއްޖެ ތަމްސީލު ކުރައްވަނީ މި ވުޒާރާގެ ކްލައިމެޓް ޗޭންޖް ޑިޕާރޓްމެންޓްގެ ޑިރެކްޓަރ އަލްފާޞިލް އަޙުމަދު ވަޙީދު އެވެ. 

އެފް.އާރު.އެލް.ޑީ. އަކީ މޫސުމަށް އަންނަ ބަދަލުތަކުގެ ސަބަބުން ތަރައްޤީވަމުން އަންނަ ޤައުމުތަކަށް ކުރާ އިއާދަނުކުރެވޭ ގެއްލުން ކުޑަކުރުމަށް އެހީތެރިވެދިނުމަށް ޙާއްސަކޮށްފައިވާ ދުނިޔޭގެ އެންމެ ފުރަތަމަ މަލްޓިލޭޓަރަލް ކްލައިމެޓް ފަންޑެވެ.

ދިވެހިރާއްޖެއަކީ އެފް.އާރު.އެލް.ޑީ.ގެ ބޯޑުގައި ހިމެނޭ ތަރައްގީވަމުން އަންނަ ކުދި ޖަޒީރާ ޤައުމުތަކަށް ހާއްސަކޮށްފައިވާ ގޮނޑިއަށް ކަނޑައަޅާފައިވާ އަލްޓަރނޭޓް މެމްބަރެވެ. މި ހައިސިއްޔަތުން، އެފް.އާރު.އެލް.ޑީގެ މަސައްކަތްތަކާއި މެންޑޭޓް ތަންފީޒުކުރުމުގައި ތަރައްގީވަމުން އަންނަ ކުދި ޖަޒީރާ ގައުމުތަކުން އިސްކަންދޭ ކަންކަމަށް ރިއާޔަތްކުރުމަށް ރާއްޖެއިން ވަކާލާތުކުރާނެއެވެ.

އެފް.އާރު.އެލް.ޑީ. ބޯޑުގެ 9 ވަނަ ބައްދަލުވުމުގައި އެފް.އާރު.އެލް.ޑީ.ގެ ބާބޭޑޯސް އިމްޕްލިމެންޓޭޝަން މޯޑެލަޓީސްތަކާއި، އޮޕަރޭޝަނަލް ޕޮލިސީތަކާއި، އިންވެސްޓްމަންޓް ޕޯޓްފޯލިއޯއާ ބެހޭ ގޮތުން މަޝްވަރާ ކުރުމަށް ވަނީ ހަމަޖެހިފައެވެ.

އެފް.އާރު.އެލް.ޑީ.ގެ ބޯޑުގައި ދިވެހިރާއްޖެއިން ބައިވެރިވުމުގެ ސަބަބުން މޫސުމަށް އަންނަ ބަދަލުތަކުގެ އަސަރު ކުޑަކުރުމަށާއި ވިލުންތެރިކަން އިތުރުކުރުމަށް މާލީ އެހީތެރިކަން ހަމަހަމަ ގޮތެއްގައި ލިބޭނެ މަގު ފަހިކޮށްދިނުމާއި، ތަރައްޤީވަމުން އަންނަ ކުދި ޖަޒީރާ ޤައުމުތަކަށް އެކަށީގެންވާ ގޮތަށް އެފް.އާރު.އެލް.ޑީ.ގެ މަސައްކަތްތައް ބައްޓަންކުރުމުގައި މޫސުމަށް އަންނަ ބަދަލުތަކާއި ގުޅޭ ބައިނަލްއަޤުވާމީ މައިދާނުގައި ދިވެހިރާއްޖޭއިން ނަގަމުންދާ އިސް ރޯލް އިތުރަށް ހަރުދަނާވެއެވެ.