15 މެގަވޮޓްގެ ސޯލާ ޕީވީ ނިޒާމަކާއި 15 މެގަވޮޓް އަވަރގެ ބެޓަރީ އެނާޖީ ސްޓޯރޭޖް ނިޒާމެއް ގާއިމުކުރުމަށް މިނިސްޓްރީން ފަހުމުނާމާއެއްގައި ސޮއިކޮށްފި

ދިވެހިރާއްޖޭގައި 15 މެގަވޮޓްގެ ސޯލާ ޕ.ީވީ ނިޒާމަކާއި 15 މެގަވޮޓް އަވަރގެ ބެޓަރީ އެނާޖީ ސްޓޯރޭޖް ސިސްޓަމެއް ތަރައްގީކުރުމަށްޓަކައި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ އާއި ޒޭޖިއަންގް ގިންގްޓިއަން ސޯލާ އެނާޖީ ޓެކްނޮލޮޖީ ކޯ އެލްޓީޑީއާ ދެމެދު ފަހުމުނާމާއެއްގައި ސޮއިކޮށްފިއެވެ.

އޮކްޓޫބަރު މަހުގެ 19 ވަނަ ދުވަހު ސާފު ރާއްޖެ ބިލްޑިންގައި ބޭއްވި ރަސްމިއްޔާތެއްގައި މި ފަހުމުނާމާގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަލްފާޟިލް ޙުސައިން އަގީލް ނަޞީރެވެ. ޒޭޖިއަންގް ގިންގްޓިއަން ސޯލާ އެނާޖީ ޓެކްނޮލޮޖީގެ ފަރާތުން ސޮއިކުރެއްވީ އެ ކުންފުނީގެ ވައިސް ޕްރެޒިޑެންޓް މިސްޓަރ ޑޮންގްޓިންގް ހޭ އެވެ.

މި އެއްބަސްވުމަކީ ރާއްޖޭގައި އިއާދަކުރަނިވި ހަކަތައިން ކަރަންޓު އުފައްދާ މިންވަރު އިތުރުކޮށް، ހަކަތަ ރައްކާކުރެވޭނެ ނިޒާމުތައް ހަރުދަނާކުރުމަށް އެޅުނު މުހިންމު ފިޔަވަޅެކެވެ. މި މަޝްރޫޢުގެ ދަށުން ސޯލާ ޕީވީ ނިޒާމަކާއެކު ބެޓަރީ އެނާޖީ ސްޓޯރޭޖް ނިޒާމެއް ގާއިމުކުރުމުން، އިއާދަކުރަނިވި ހަކަތަ އެންމެ އެދެވޭ ގޮތެއްގައި ބޭނުންކުރުމަށް މަގުފަހިވެ، ކަރަންޓުގެ ވިއުގަ އިތުރަށް ހަރުދަނާވެ އިތުބާރު ބޮޑުވެގެންދާނެއެވެ.

ޒޭޖިއަންގް ގިންގްޓިއަން ސޯލާ އެނާޖީ ޓެކްނޮލޮޖީއާއެކު ވެވުނު މި އެއްބަސްވުމަކީ، ތިމާވެއްޓާ ރައްޓެހި ހަކަތައިގެ އިންފްރާސްޓްރަކްޗަރ ތަރައްގީކުރުމަށާއި، 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް ސަރުކާރުން ކަނޑައަޅާފައިވާ އަމާޒަށް ވާސިލުވުމަށް އެޅުނު މުހިންމު ފިޔަވަޅެކެވެ.

މިފަދަ މަޝްރޫޢުތަކުގެ ޒަރީޢާއިން، ރާއްޖޭގެ ހަކަތައިގެ ވަޞީލަތްތައް އިތުރުކުރުމަށާއި، ކަރަންޓު ވިއުގަ ތަރައްގީކުރުމަށާއި، ސާފު ހަކަތައިގެ މުސްތަގުބަލަކަށް ރާއްޖެ ކުރާ ދަތުރުގައި އިއާދަކުރަނިވި ހަކަތައިގެ ޓެކްނޮލޮޖީތައް އާންމުކުރުމަށް މިނިސްޓްރީން ދަނީ މެދުނުކެނޑި މަސައްކަތް ކުރަމުންނެވެ.